Birthday ni Ron Angeles ngayong August 12 at ang wish niya ay maging banner year para sa kanya ang susunod na 12 months.

 

Sa kuwentuhan namin ng 26-year old actor ay ni-reveal niya na pinakaaasam niyang makapareha si Kathryn Bernardo.

Dati na raw siyang fan ng ex-girlfriend ni Daniel Padilla at wala siyang pinalalagpas na movie nito, his favorite being ‘Hello, Love, Goodbye.’

“Doon ko kasi nakita na kahit kanino mo i-partner si Kath ay kaya niyang dalhin,” sey ni Ron. “Andun lagi ‘yung pagiging aktres niya, ang pagmamahal niya sa craft.”

Kung sakaling magkatotoo ang tambalan nila ay hindi rom-com movie ang nais ni Ron, kundi cyber drama or sci-fi, “Para maiba sa panlasa ng tao,” he said. “Kung sakali ay first time makikita si Kath sa ganung genre.”

Pangarap lang naman ni Ron ‘yon kaya huwag nang magtaas ng kilay ang mga intrigero’t intrigera, ha!

Anyway, hindi na namin natanong si Ron kung crush din ba niya si Kath. Pero napag-usapan namin ni birthday boy ang kanyang love life. Well, meron nga ba?

“Wala, hindi ko priority ‘yan. Sa dami ng ginagawa ko ay baka ‘di ko lang siya mapagtuunan ng panahon,” sey ni Ron. “Ang kailangan ko ay taong makakaintindi sa trabaho ko, sa schedule ko.”

Hindi lang naman kasi sa showbiz nakatuon ang aktor kundi sa kanyang businesses tulad ng isang restaurant sa Q.C. at fitness center sa Parañaque City.

Nabanggit nga pala ni Ron na may isu-shoot siyang movie starting next month, pero hindi pa niya puwedeng sabihin ang pamagat. Napag-uusapan na rin daw nila ng kanyang manager na si Bryan Dy, of Mentorque Productions, ang isang malaking solo movie para sa kanya, so wait na lang natin ang mga developments, ok?