Andrea Brillantes, Daniel Padilla at Kathryn Bernardo

TRUE kaya ang chika na hindi muna bibigyan ng bagong project ng ABS-CBN si Andrea Brillantes matapos masangkot sa hiwalayang Kathryn Bernardo at Daniel Padilla?

Yan ang mainit na pinag-uusapan ngayon ng mga Marites all over the universe! Ang tsismis, pagkatapos daw ng matagumpay na “Senior High”, matetengga muna ang career ni Andrea.

Ang balita kasi, right after ng “Senior High” ay bibigyan agad ng follow-up project ng ABS-CBN si Andrea pero dahil nga siya ang sinisisi sa breakup ng KathNiel, mukhang tuturuan muna raw ng leksyon ang dalaga.

Sa nakaraang episode ng “Showbiz Update” vlog ng talent manager at content creator na si Ogie Diaz, napag-usapan nga ang tungkol sa career ni Andrea.

“Actually kasi dapat masundan na ‘yon (Senior High). Sana masundan siya. Kasi kahit naman ako, pwede akong maghanap pa o mag-crave ng more sa isang Andrea Brillantes pagdating sa series. E, lalo na successful ang ‘Senior High,’” ang sey ni Papa O.

Ngunit naniniwala raw siya na kahit nadamay si Andrea sa kontrobersyal na hiwalayan nina Kathryn at Daniel na itinuturing na prized possession ay hindi pababayaan basta-basta ng network si Andrea.

“Dahil may nakausap nga ako sa management ng ABS-CBN na magkakaroon ng sequel ang ‘Senior High.’ Dahil may clamor at maganda ang serye kaya sila-sila ulit ang mga bida,” rebelasyon ni Papa O.

Matinding pamba-bash at pangnenega ang inabot ni Andrea nang kumalat ang chikang siya ang third party umano sa breakup ng KathNiel.

Hanggang ngayon ay wala pa ring diretsahang pagdedenay o pag-amin na ginagawa ang mga taong involved sa isyung ito.