Ang production number nina Daniel Padilla at Kathryn Bernardo para sa Christmas Special ng ABS-CBN ang okasyon na tinutukoy ng Cabinet Files sa report nito noong Disyembre 4, 2023.
Napapayag ang dalawa na muling magsama pagkatapos ng pagwawakas ng kanilang labing-isang taon na relasyon na kapwa nila kinumpirma noong Nobyembre 30, 2023.
Nangyari ang pagsasama nina Daniel at Kathryn sa taping ng “Forever Grateful: The ABS-CBN Christmas Special” na ginanap sa Smart Araneta Coliseum noong Miyerkules, Disyembre 13, 2023.
Dumagundong ang Big Dome dahil sa malakas na hiyawan at palakpakan ng KathNiel fans sa “I’ll Be There for You” production number ng ex-showbiz couple.
Nagpakita ng propesyonalismo ang dalawa kaya tumanggap sila ng mga papuri mula sa kanilang mga tagahanga na nabuhayan ng pag-asa na maaaring magkabalikan ang dalawa sa tamang panahon.
Ikinatuwa ng fans nina Kathryn at Daniel ang viral video ng pag-uusap nila sa backstage ng Smart Araneta Coliseum na parang hindi sila naghiwalay.
May production number sa “Forever Grateful” si Andrea Brillantes at si Kyle Echarri, ang mga lead star ng television series na Senior High.
Dati nang kontrobersyal si Andrea na lalong umingay ang pangalan dahil siya ang itinuturo na dahilan ng paghihiwalay nina Kathryn at Daniel.
Bukod sa mga nabanggit na personalidad, may partisipasyon sa “Forever Grateful” sina Coco Martin, Vice Ganda, Gary Valenciano, Martin Nievera at ang ibang mga loyal star ng Kapamilya Network.
May dalawang bahagi ang “Forever Grateful: The ABS-CBN Christmas Special” na mapapanood sa Disyembre 16 at Disyembre 17, 2023 sa Kapamilya Channel, Kapamilya Online at A2Z.
