“Thank you for being open this year.”

Ito ang thank-you message ni Julia Montes para sa sarili na sinabi niya sa kanyang live guesting sa Fast Talk With Boy Abunda nitong Huwebes ng hapon, Oktubre 5, 2023.

May katotohanan ang sinabi ni Julia dahil kahit limitado ang kanyang mga pahayag, sinasagot na niya ang mga tanong tungkol sa relasyon nila ni Coco Martin.

“My knight in shining armor,” ang walang pag-aalinlangang sagot ni Julia nang magtanong si Boy kung sino si Coco sa buhay niya.

Inamin ni Julia na may kapwa artista ito na pinagselosan at nagseselos siya depende sa dapat pagselosan.

Magagawa rin umano ni Julia ang magpatawad nang paulit-ulit kapag mahal niya ang tao at, ayon sa kanya, masayang-masaya siya ngayon.

“Lovable” at “mas malambing” ang pagsasalarawan ni Julia kay Coco at, diumano, nahanap na niya ang kanyang “the one.”

“Ten” naman ang siguradung-siguradong sagot ni Julia nang itanong ni Boy kung gaano siya ka-in love ngayon.

Sa “Talk or Dare” segment ng Fast Talk With Boy Abunda, pinili ni Julia ang magsalita kesa tanggapin ang hamon na sumayaw siya na parang walang nanonood.

“Parang nakaka-stress po yung dare. Talk na lang. Parang mas nahihiya po akong sumayaw sa harap ng mga tao,” reaksiyon ni Julia sa tanong na engagement o wedding ring ba ang suot niya nang dumalo sila ni Coco sa ABS-CBN Ball na ginanap noong Setyembre 30, 2023 sa Makati Shangri-La.