Aljur iwas pag-usapan si AJ; inaming nag-uusap sila ni Kylie para sa mga bata

MAY ginawang horror film si Aljur Abrenica titled Jeongbu mula direksiyon ni Topel Lee. Ito ang first time na gumawa siya ng isang horror film.

Ayon kay Aljur, nang makachikahan namin siya sa grand launch ng Gutierez Celebrities and Media Productions, natutuwa siya na naidirehe siya ni Topel. Isa kasi ito sa mga hinahangaan niyang direktor simula nang mapanood niya ang mga pelikulang horror na ginawa nito.

Sa tanong kung kamustang katrabaho  si Direk Topel, ang sagot ni Aljur, “Sobrang cool na direktor. Mahusay! Magaan kasama.”

Sa tanong namin kung magkakaroon ng premier night ang nasabing pelikula, sino ang isang tao na gusto niyang isama?

“Usually, ‘pag premier night ako lang mag-isa, eh. Gusto mo bang sumama?” natatawang sagot ni Aljur.

Sa naging sagot ni Aljur, halatang iniiwasan niyang mabanggit ang pangalan ng girlfriend niyang si AJ Raval. Ang pangalan kasi ng sexy actress ang hinihintay na sagot namin mula kay Aljur simula nang umamin na siya na sila na ni AJ.

Pero nang kunin ang reaksiyon niya sa sinabi ng dating asawang si Kylie Padilla na masaya ito sa relasyon nila ni  AJ, dito na nagbigay ng pahayag si Aljur. Sabi niya, “Alam ko naman ‘yun, eh. Nag-uusap naman kami, eh.”

Dagdag pa niya, “No choice, eh. Ang choice namin is maging maayos talaga kami para sa mga bata. Mag-uusap at mag-uusap kami talaga para sa mga bata.”

Sina Aljur at Kylie ay may dalawang anak na lalaki, sina Alas at Axl.