– Nanawagan ang ama ni Carlos Yulo na si Mark Andrew Yulo na magkaroon ng pagkakataon na mag-usap ang kanilang buong pamilya

– Sa panayam ng Bombo Radyo sinabi ni Mr. Yulo na nais niyang linawin ang kanilang mga hindi pagkakaintindihan

– Hiling ni Mr. Yulo na mag-usap-usap ang kanilang pamilya kasama si Chloe upang matapos ang kanilang alitan

– Wala pang pahayag si Carlos Yulo ukol sa panawagan ng kanyang ama

Nanawagan ang ama ni Carlos Yulo, si Mark Andrew Yulo, na magkaroon ng pagkakataon na mag-usap ang kanilang buong pamilya. Sa isang panayam ng Bombo Radyo, sinabi ni Andrew na nais niyang magkaroon ng pag-uusap sa kanilang pamilya upang linawin ang kanilang mga hindi pagkakaintindihan, kabilang na ang mga akusasyon laban sa kanila.

Ama ni Carlos Yulo: “Kahit sa kanila na yung cash, basta magkabalikan lang yung love ng family” Source: Facebook

Sa kanyang pahayag, sinabi ni Mr. Yulo na binabati niya si Carlos at si Chloe, at umaasa siyang magkakaroon sila ng pag-uusap, partikular na ni Carlos at ng kanyang ina, upang maayos ang anumang isyu na naglalabasan. Iginiit din ni Mr. Yulo na hindi totoo ang mga kumakalat na balita tungkol sa kanilang pamilya.

Ayon pa kay Mr. Yulo, ang kanyang tanging hangad ay mabuo muli ang kanyang pamilya. Hiniling din niya na mag-usap-usap ang kanilang pamilya, kabilang si Chloe, upang matapos na ang kanilang alitan. Dagdag pa niya, kahit pa ibigay na sa iba ang pera, basta’t maibalik lamang ang pagmamahalan sa kanilang pamilya.

Sa ngayon, wala pang pahayag si Carlos Yulo ukol sa panawagan ng kanyang ama. Matatandaang kumalat sa social media ang mga post ni Mrs. Yulo kung saan tila sinuportahan pa nito ang Japan kaysa sa kanyang sariling anak.

Si Carlos Edriel Yulo ay isang tanyag na gymnast mula sa Pilipinas. Siya ay kilala sa kanyang mga kahanga-hangang pagtatanghal sa iba’t ibang gymnastics competitions, partikular na sa floor exercise at vault. Si Yulo ay nagsimulang mag-train sa murang edad at nagkaroon ng pagkakataong mag-aral at magsanay sa Japan, na lalong nagpahusay sa kanyang kasanayan. Siya ang kauna-unahang Pilipino na nanalo ng gintong medalya sa World Artistic Gymnastics Championships noong 2019.

Naging kauna-unahang gymnast at lalaking atleta mula sa Pilipinas si Carlos Yulo na nanalo ng gintong medalya sa 2024 Paris Olympics. Inihayag ng ina ni Yulo na si Angelica Poquiz Yulo ang alitan nila dahil sa kasintahan ni Caloy na si Chloe San Jose.

Hindi nagpatinag si Chloe San Jose sa kabila ng alegasyon na siya ang dahilan ng tensyon sa pagitan ni Carlos Yulo at ng kanyang pamilya. Sa comment section ng post niya, tinanong ni Chloe kung bakit nawala ang video ng panayam sa ina ni Carlos at humingi ng kopya para sa reference.