Karylle to ex-boyfriend Dingdong Dantes: “Hi, Sixto. Belated happy birthday.” 
PHOTO/S: @ANAKARYLLE INSTAGRAM / ROSE GARCIA FOR PEP.PH

Todo-iwas man noong una, napasubo pa rin si Karylle na banggitin ang pangalan ng kanyang ex-boyfriend na si Dingdong Dantes.

Nganap ito habang umeere ang It’s Showtime ngayong Martes, August 18.

Si Karylle ang player sa “Mas Testing” segment ng Kapamilya noontime show, at may katanungan siyang hindi nasagot kaya pinatawan siya ng “fun-ishment” o kuwelang parusa.

Sina Vice Ganda at Vhong Navarro ang co-hosts, at contestants sina Randy Santiago at Mitoy Yonting.

Sabi ni Vice Ganda, “Ito ang punishment mo, Karylle: Mag-‘Hi!’ sa isang ex na kilala namin on national television.”

Naiilang na tanong ni Karylle, “Wala naman akong number. Feeling ko blinock ako, e. Tatawagan ko?”

Nilinaw naman nina Vice at Vhong na haharap lang si Karylle sa camera at magbigay ng “greetings” sa ex-boyfriend.

Maya-maya pa ay inamin ni Karylle kung bakit nag-aalangan siya.

“Kinakabahan ako. Baka ma-bash ako mamaya,” ani Karylle.

Sabi pa niya kay Vice, “Kapag binash ako, you got me girl, ha?”

“I got you! I got you!” paniniguro ni Vice.

Klinaro rin ni Vice na parte lang ng “fun-ishment” segment ang gagawing pag-hi ni Karylle sa ex-boyfriend nito.

“Hi lang naman ito. This is just a game. Huwag niyo seseryosohin. Ang may gusto po nito ay yung gumawa ng game. Walang kinalaman si Karylle dito, so wala siyang choice.”

Bago ito ay nilaglag ni Vice si Vhong na siyang pumili raw sa limang options ng “punishment” para kay Karylle.

Para huwag masyadong mahirapan si Karylle ay “Hi!” na lang daw ang sabihin niya at wala nang message.

Ilang beses bumuwelo si Karylle, pero hindi rin niya agad nagawang mag-hi sa ex-boyfriend.

“YUNG MAHIRAP YUNG IBA-BASH AKO MAMAYA.”

Sa puntong ito ay hindi pa rin pinapangalanan ni Karylle kung sinong ex-boyfriend ang tinutukoy niya.

Paliwanag ulit ni Karylle, “Actually, madali lang yung ‘Hi!’ Yung mahirap, yung iba-bash ako mamaya.

“Ibang ex na lang. Kilala ni DJ Mod… Hindi na kailangan buong pangalan.”

Sa halip na tukuyin ang ex-boyfriend niyang kilala ng kanyang co-hosts, ang binanggit ni Karylle ay isang “Mark P.”

“Hi, Mark! Kumusta? Sana okay ka.”

Nang maitawid ni Karylle ang punishment, hirit ni Vice, “Ayan, sinave kita!”

Balik-sagot ni Karylle, “Feeling ko sinave mo kasi uulitin mo sa next [punishment].”

Natatawang tinukso pa ni Vice si Karylle na kailangang galingan niya sa contest dahil “ang susunod na punishment mag-hi sa asawa ng ex.”

Sabi naman ni Karylle, “Kaya ko na! Kasi na-warm up na ako. I’m ready for anything now. Ready na ako kahit sinong hello, tawagan natin, whatever.”

KARYLLE CALLS DINGDONG BY HIS NAME SIXTO

Muling nagkamali si Karylle sa pinahulaan sa kanya sa segment, kaya binigyan ulit siya ng parusa, ang na gupitan ng one-inch ang kanyang bangs.

Habang nakaharap sa salamin at akmang gugupitan ang kanyang bangs, saka nagbigay ng greeting si Karylle para kay Dingdong.

Ani Karylle, “Hi to my ex! Kumusta kayo diyan?”

Hamon ni Vice, “Sige, sabihin mo totoong pangalan ng ex na kilala namin!”

Tinupad naman ni Karylle.

“Hi, Sixto. Belated happy birthday,” tukoy niya kay Dingdong, na ang full name ay Jose Sixto Dantes III.

Si Dingdong ay nagdiwang ng ika-40 kaarawan noong August 2.

Hirit ni Vice, “Taray! Brave girl!”

Balik-sagot ni Karylle, “Happy ka na, Vice?!”

Paglilinaw naman ni Vice, “Friend naman natin sila.”

Pagsang-ayon ni Karylle, “Oo, friend natin sila.”