Pinag-uusapan ng netizens ang bagong selfie post sa Instagram Story ng French-Filipino golfer na si Emilienne Vigier kahapon, September 4, 2023.

Kasama niya sa larawan ang rumored boyfriend na si Joshua Garcia.

Medyo cozy ang selfie nila kung saan may inilagay na caption si Emilienne na “Jtmmmm.”

Ang nasabing salita ay maaring “je t’aime” na ang ibig sabihin sa French ay “I love you.”

Tila hayag na ang level-up na relasyon ng dalawa ngunit nanatiling tikom ang bibig ni Joshua dito.

Nitong nakaraang August 23, 2023, tila ipinagsigawan ni Emilienne sa mundo ang kanyang bagong gym body.

Nag-post siya ng larawan na kuha sa isang gym kasama ang isang lalaking bandang nguso lamang ang nakita.

Wala siyang inilagay na caption sa kanyang post.

Pero kung titingnang mabuti ang lalaking katabi niya na nakasuot ng black shorts, yellow socks, at gray shoes, kawangis nito ang katawan ni Joshua.

Noong August 19, nag-post na rin ng ibang picture si Emilienne na nasa gym pa rin kasama ang gym buddy niya.

Pero kahit nakatalikod ang lalaki, mababanaag na si Joshua ito.

Noong July, usap-usapan na rin ang anila’y magkaparehong Instagram posts nina Joshua at Emilienne.

Ibinahagi ni Joshua ang litrato niyang nagluluto sa isang kitchen kasama ng iba-ibang litrato ng main dishes tulad ng chicken and pork katsu, honey garlic chicken, at kinamatisang pampano.

Agaw-pansin ang mga ito dahil nag-post din si Emilienne via IG story ng dalawang litrato na pareho ng kay Joshua.

Una na rito ang litrato ng chicken and pork katsu na nilalagyan ng harina na pang-breading.

Sumunod ang litrato ng nalutong chicken and pork katsu.