Hindi naman siguro na-offend si Marian Rivera nang tawagin siyang “Tita Yan” ni Kobe Paras sa premiere night ng pelikula niyang Balota. Naganap ito noong hiningan si Kobe ng mensahe para sa aktres at sa pelikula, na magsisimula nang ipalabas bukas, October 16.

Sa kaganapang iyon, kitang-kita na may halong kaba si Kobe Paras habang hawak ang mikropono at ibinibigay ang kanyang mensahe. Hindi kasi siya sanay sa mga interview, lalo na sa harap ng maraming tao. Natawa rin ang kanyang kapwa aktres na si Kyline Alcantara na nasa tabi niya nang marinig ang salitang “Tita” mula kay Kobe, ngunit halatang wala namang intensyon si Kobe na bastusin si Marian. Sa katunayan, naramdaman ng mga tagahanga ang kanyang pagkailang at kaba.

Nagbigay naman ng kanilang opinyon ang mga fans nina Kobe at Kyline sa insidente. Ayon sa kanila, siguradong naintindihan ni Marian ang sitwasyon. Kilala si Marian sa kanyang pagiging mabait at approachable, kaya malabong nagdamdam siya sa pagtawag sa kanya ni Kobe ng “Tita.” May mga fans din na nagpahayag ng posibilidad na matagal nang kilala ni Kobe si Marian, lalo na’t nagkasama noon si Marian at ang tatay ni Kobe, na si Benjie Paras, sa ilang proyekto sa GMA-7. Posibleng dinala ni Benjie si Kobe sa set noong bata pa ito, kaya hindi na bago ang pagkakakilala ni Kobe kay Marian.

Sa video ng premiere night, makikita kung paano mainit na winelcome ni Marian sina Kyline at Kobe. Nasa kanya ang trademark na warm smile at open arms habang binibigyan ng oras ang dalawa. Sa isang bahagi ng video, nagkaroon pa ng sandaling pag-uusap sina Marian at Kobe, na tila may malalim na pinag-usapan o simpleng pagbati lamang sa isa’t isa.

Pagdating sa Balota, malaki rin ang saya ng mga influencer na sina Sassa Gurl at Esnyr Ranollo na kasama ni Marian sa pelikula. Nabanggit ni Marian na gusto pa niyang makatrabaho ang mga ito sa ibang proyekto, at nagbigay pa siya ng ideya na maaari silang gumawa ng seryosong proyekto pero may “twist,” na siguradong ikatutuwa ng dalawa.

Mukhang game na game talaga si Marian sa mga bagong proyekto at excited na makatrabaho ang mga bagong henerasyon ng mga artista at influencer. Tulad ng kanyang mainit na pagtanggap kina Kyline at Kobe, tila walang pag-aalinlangan si Marian na yakapin ang mga bagong hamon at makipag-collaborate sa iba’t ibang mga personalidad sa industriya.