Naging highlight ng isang Facebook live selling session ni Mommy Angelica Yulo, ina ng Olympic gold medalist na si Carlos Yulo, ang pagbisita ng komedyante at aktres na si Ai Ai delas Alas noong Martes, Oktubre 15. Hindi lang basta nagpakita si Ai Ai sa live, sumama rin siya sa kasiyahan at tumulong sa pagbebenta ng mga damit at bag na itinatampok sa session.

Ikinatuwa ng mga netizens ang interaction ng dalawa, lalo na nang magsimulang magmodelo si Ai Ai ng mga paninda at ipakita ang kanyang trademark na pagpapatawa habang binibenta ang mga produkto. Naging makulay at masaya ang livestream dahil sa aktibong pakikilahok ng aktres, na umani ng maraming positibong komento mula sa mga manonood.

Matatandaang noong Setyembre, sinabi ni Ai Ai na nais niyang suportahan ang live selling ni Mommy Angelica dahil nakakarelate siya sa sitwasyon ng mga gaya nito. Ipinakita ni Ai Ai ang kanyang buong-pusong pagsuporta sa kaibigan, na lalong nagpatingkad sa kanilang samahan at nagbigay saya sa mga fans na nanood ng kanilang livestream.