Chavit Singson on two-time Paris Olympics gold medalist Carlo Yulo’s family issue: “Kung anuman ang napag-awayan noong araw, sana patawarin ninyo na ang nanay ninyo. Kung siya ang may kasalanan o kung sinuman ang may kasalanan, mas maganda sana dahil wala ka naman dito sa mundong ito kung hindi [dahil] sa nanay at tatay mo.”

Masusubok ang prinsipyo at paninindigan ni Carlos Yulo sa nakatutuksong alok ng billionaire businessman na si Luis “Chavit” Singson.

Handa raw magbigay ng limang milyong piso si Singson kung magkakasundo ang two-time Olympic gold medalist at ang pamilya nito.

Pera ang sinasabing ugat ng hidwaan ni Carlos at ng kanyang inang si Angelica kaya malalaman sa mga susunod na araw kung pera rin — sa pamamagitan ng pabuyang ipagkakaloob ni Singson — ang magiging dahilan para magkapatawaran ang mag-ina.

Carlos Yulo with his parents, Angelica and Mark Andrew Yulo, during happier times. 
Photo/s: Adamson University Facebook

Inilahad ni Singson sa kanyang official Facebook page nito ang kanyang tempting offer.

Base sa kuwento ng dating gobernador ng Ilocos Sur, may nakausap na siyang miyembro ng pamilya ni Carlos.

Lahad niya: “Parang nag-away-away, hindi nila makontak. So, kako, okay lang, pero paano kaya makontak?

“Nag-press release na lang ako para lang magsama-sama sila, buong pamilya, magbibigay ako ng limang milyon.

“Hindi [dahil] sa panalo niya na gold sa Olympics, more on yung sa pamilya.

“Kasi nararamdaman ko yung kaaway mo yung anak mo. Masakit sa ama na aawayin ka ng anak mo at hindi man lang sila inimbita.

Marahil ang tinutukoy ni Singson ay ang hindi pagsalubong ng pamilya ni Carlos sa pagdating nito, kasama ang iba pang Pinoy athletes na lumahok sa Paris Olympics, sa Villamor Airbase noong August 13, 2024.