Team Heart ng ‘Unbreak My Heart,’ nanalo ng PhP200,000 jackpot prize sa game show na ‘Family Feud.’

Bago ang pagsisimula ng pinakaaabangang serye na Unbreak My Heart, nakisaya at nakipagkulitan ang ilang cast ng serye sa Family Feud.

Courtesy: GMA Network and Family Feud

Isang special episode ang napanood ngayong Lunes, May 29, sa naturang GMA game show kung saan napanood na nahati sa dalawang grupo ang mga bisita ng programa.

Ang grupong Unbreakable ay kinabilangan ng isa sa lead stars ng serye na si Joshua Garcia at kanyang co-stars na sina Will Ashley, Bianca De Vera, at Jeremiah Lisbo.

Courtesy: GMA Network and Family Feud

Ang isa namang grupo ay tinawag na Team Heart, kung saan napabilang sina Nikki Valdez, Maey Bautista, PJ Endrinal, at Mark Rivera.

Nang kumustahin ng host ng game show na si Dingdong Dantes si Joshua, may cool na pa-challenge pa siya sa aktor.

Pina-deliver ni Dingdong kay Joshua ang sikat na linya ng show na “Ano ang sabi ng survey?” at ginawa ito ng aktor na mayroong iba’t ibang emosyon.

Ramdam ang kilig at saya ng audience nang marinig nila ang boses ni Joshua.

Game na game na naglaro ang dalawang grupo at sa huli ay itinanghal na nagwagi ang Team Heart.

Matapos nito, masayang-masaya sila Nikki, Maey, PJ, at Mark nang maipanalo nila ang PhP200,000 jackpot prize sa kanilang paglalaro.

Courtesy: GMA Network and Family Feud

Samantala, bukod kay Joshua, kabilang din sa mga bida sa serye sina Gabbi Garcia, Richard Yap, at Jodi Sta. Maria.

Nito lamang May 27, nagsimula na ang advance streaming ng Unbreak My Heart, kung saan napanood ito at patuloy na ipapalabas sa GMANetwork.com, iWantTFC, at Viu.

Ngayon namang Lunes, May 29, mapapanood na ang serye sa GMA Telebabad, Pinoy Hits, at I Heart Movies, 9:35 p.m., at sa GTV naman ay sa oras na 11:25 p.m.